Móvete+ é unha proposta para toda a comunidade do centro educativo. Trátase de promover a actividade física a través dunha acción de carácter lúdico, transversal, divertida e ao mesmo tempo sumar máis cantidade de exercicio físico para achegarnos ao que recomenda a Organización Mundial da Saúde.

A través dunha coreografía, música e letra orixinal, e a súa implantación nas clases de Educación Física, Música, nos tempos de lecer, nos cambios de clase, etc, Móvete+ busca difundir a necesidade de adquirir hábitos de vida activa orientada ao mantemento e mellora da saúde, e a prevención de enfermidades crónicas non transmisibles (ECNT).

Os centros educativos teñen a liberdade de seguir a coreografía no seu formato orixinal ou ben, partindo desta proposta, realizar unha adaptación da mesma (coreografía, música, vestiario, etc).

Na memoria final deberase entregar un vídeo ou unha ligazón a unha web, blog ou páxina similar coa coreografía traballada (ensaios, actividades, etc.) e o seu resultado final (flashmobe, lipdup, etc).

MMAF busca posibilitar unha accion transversal, compartida e común das materias de Ciencias Socias / Naturais e Educación Física, sen excluir a outras materias que poidan, a través das súas actividades curriculares, promover hábitos de vida activa e saudable a través do incremento de  actividade física no día a día. Sempre que os/as profesores/as das materias estean dacordo, poderase compartir  unha hora semanal da materia de Ciencias Sociais / Naturais adicándoa á realización dunha programación de actividades que,  partindo dos curriculums educativos de ambas materias e  respondendo ás necesidades e intereses das mesmas,  se realicen a  través de tarefas que conleven unha carga de actividade física.

A presencia dos responsables de ambas materias (profesor/a de Ciencias Socias / Naturais e profesor/a de Educación Física) é imprescindible para que a transversalidade da acción proposta obteña uns resultados satisfactorios.

O programa Xogade (Xogos Galegos Deportivos en idade escolar) ten como finalidade que a actividade física chegue a ser un hábito diario na nosa poboación escolar, orientando a súa práctica non soamente cara o deporte competitivo, senón cara a unha actividade física, exercicio físico ou deporte orientado para a saúde, mantendo estes hábitos físico-deportivos saudables e de vida activa, adquiridos na idade escolar, ata a vellez.

Por iso é clave a súa práctica desde a infancia nos ámbitos educativo e familiar, fundamental para o futuro estilo de vida e a consolidación de hábitos físico-deportivos saudables.

As modalidades de Xogade incluídas dentro do Plan Proxecta son as correspondentes a "Actividade Deportiva" . A participación a través de proxectos de innovación educativa busca, coa escusa de participar na actividade deportiva de Xogade, que esta participación chegue ao alumno dunha forma diferente, fomentando o uso da novas tecnoloxía e facendo participe ao  resto da comunidade educativa (centro, familias, concello, etc).

A Plataforma DAFIS (Datos de Actividade Física Saudable) é unha ferramenta elaborada, en colaboración co COLEF- Galicia,  ao abeiro do PLAN GALICIA SAUDABLE promovido pola Xunta de Galicia e coordinado pola Secretaría Xeral para o Deporte, para facilitarlle aos profesionais do ámbito da actividade física e do deporte a valoración da condición física dos seus alumnos/as, deportistas e da cidadanía en xeral que participa de iniciativas vinculadas á práctica de actividade física e deporte.

A través do Plan Proxecta, DAFIS busca que a valoracion da condición fisica para a saúde se traballe no centro deportivo dun modo transversal, co apoio das novas tecnoloxias, e facendo máis participe ao alumnado no proceso da súa valoración, no análise dos resultados e na toma de decisións posteriores para mellorar o seu estado de condición física para a saúde

DAFIS cumpre cos seguintes obxectivos:

• Unificar as probas de condición física (saudable) para os diferentes grupos de idades que se  realizan en Galicia a través das diferentes entidades (centros educativos, concellos, entidades privadas, etc).
• Dotar as diversas entidades que realizan en Galicia valoracións da condición física saudable dunha ferramenta útil e eficaz para a xestión dos datos obtidos, estatísticas, comparativas e informes personalizados dos diferentes individuos e colectivos cos que traballan.
• Formar os profesionais da Educación Física e o Deporte, así como outros profesionais das áreas da Saúde, na utilización e xestión da plataforma.
• Dotar a administración dunha ferramenta que permita, a nivel estatístico, obter informes completos do estado de saúde dos galegos e galegas en función dos seus parámetros de  condición física saudable, para a posterior planificación de políticas de prevención e mellora da saúde a través do incremento do consumo diario de actividade física, exercicio físico e deporte.

O Plan de Fomento de Actividade Física Galicia Saudable establece entre as súas prioridades, e fronte aos prexuízos derivados do sedentarismo, o incremento da actividade física en idade escolar, tanto no centro escolar (dentro e fora do currículo) coma fóra del.

Preténdese difundir entre a comunidade educativa a necesidade de levar unha vida activa e propiciar que os nenos e nenas incrementen a súa carga de  actividade física realizada no ámbito do centro educativo, experimentando novas formas e modelos para  a conseguir unha condición física máis saudable e a adoptar uns hábitos de vida máis activos.

O centro escolar debe actuar como dinamizador e promotor de hábitos de vida activa e saudable, rentabilizando os recursos existentes no seu ámbito de influencia (públicos e privados). O obxectivo final  é que o 100%  dos alumnos e alumnas reciban información e asesoramento de como incorporar no seu día a día, tanto no horario lectivo coma no no- lectivo, actividade física, exercicio físico ou deporte como hábito de vida saudable, ase como incrementar, na súa estadía no centro, a práctica de actividade física, loitando contra o sedentarismo e creando hábitos que perduren fora do centro escolar e ao longo de toda a vida.

O PDC é o instrumento de planificación, desenvolvemento e  avaliación dos programas de   fomento da actividade física, exercicio físico e deporte para a saúde nos escolares galegos, sendo o primeiro paso para a constitución dunha Unidade de Promoción do Exercicio Físico Saudable (UPES) nos centros educativos.

O PDC terá un coordinador (deportivo) do centro que  actuará como nexo de unión, coordinando e rentabilizando as actuacións que se poidan realizar entre os distintos axentes implicados (como poden ser entre outros):

• Secretaría Xeral para o Deporte.
• Consellería de Educación e Ordenación Universitaria.
•  Persoal docente do centro escolar e resto de persoal dos centros educativos (conserxería, limpeza, cociña, mantemento, etc).
•  A.N.P.A. e comunidades educativas.
•  Concello.
•  Agrupación deportiva escolar.
•  Servizos deportivos da localidade (públicos e privados).

Actualmente, o Proxecto Deportivo de Centro é un dos programas que Galicia Saudable leva a cabo a través do Plan Proxecta, de innovación educativa, da Consellería de Cultura,  Educación e Ordenación Universitaria.

O Plan Proxecta é unha iniciativa da Consellería de Cultura, Educación e Ordenación Universitaria, en colaboración con diferentes organismos, dirixida a fomentar a innovación educativa nos centros a través de programas educativos que desenvolvan as competencias clave como eixe do currículo e os elementos transversais, nos cales se inclúe a educación en valores.

Trátase dun plan que busca un avance nas dinámicas de mellora da calidade educativa e favorecer a innovación nos propios centros a través de programas externos que leven á motivación e ao traballo activo, cooperativo e en rede, do alumnado e do profesorado implicado. Para iso, un dos principais obxectivos deste plan é promover a realización de proxectos interdisciplinarios que poidan servir de modelo de traballo ou de boa práctica, tanto para o propio centro en que se orixinan como para o resto da comunidade educativa galega.

Galicia Saudable coordina, a través do Plan Proxecta, 5 programas distintos, un principal o Proxecto Deportivo de Centro, e 4 derivados deste, DAFIS, Mais e Mellor Actividade Física, Xogade e Móvete+.